Der Reto wohnt im Liachtasta,
mit Sehnsucht noch der Wält.
Sitzt immer nur Daham, alla,
zum reisa fählt ihm s´Gäld.
Er glaret ufa Gänglesee,
so klar, so blau, so voll,
set sich und sinem Fernweh:
„Passt scho do, momoll“
Kurz druf siaht er uf Instagram,
was andri loht verzücka,
Miami, Sydney, Amsterdam,
scho spannender als d´Sücka.
Drum fangt er a spära,
Und zellt jeda Stutz,
bald muas er num plära,
und haut ufa Putz.
Und stell dr vor,
uhuara schö,
noch knapp zwei Johr,
hätr Gäld wia Hö.
Er verkoft sin Töff,
und liest a Reisebroschürli,
es isch kan Blöff
er hät a Ticket ab Züri.
Kurz vorm Abflug,
uf dr Alp Gafadura,
trifft er uf d´Gertrud,
dia gfallt ihm uhuara.
Hät s´Ticket zerressa,
und sini Plän verworfa.
alli Sehnsücht vergessa,
und mitr Gerti sich troffa.
Sini Welt isch ganz rosa,
und d´Gerti so schö.
er well Vögel zualosa,
bi Räga und Pföh.
Er ritzt a Herzli uf jeda Bomm,
vo Balzers bis zum Ruggeller Riat,
damit oh seher alli verstohn,
der huara Tubel isch verliabt.
Noch acht Wocha ebba,
fallt ihm was uf:
Gerti hört num uf reda,
holt kaum no schnuf.
A knackigs Füdli,
Bei bis zum Hals,
Nur im Oberstübli.
stimmt numa alls.
d´Ziet vergoht,
manch Liabi verjöhrt.
Der Reto verstoht:
d´Gerti isch gstört.
Er will weder weg,
sich möglichst bald trenna.
Hawaii oder Steg,
no weg vo dera Henna.
Der richtig Moment
isch no ned ko,
wenn d´Gerti ned pennt,
hängt sie überm Klo.
Plötzlich hät er an Verdacht,
und glei druf a Schöckli:
letzthin hän sie umagmacht.
Ohni Nahkampfsöckli.
Gopfridstutznochamol,
der Schwangerschaftsstreifa,
ach hätt er sichs dozmol,
nur könna verkneifa.
Der Test isch positiv,
a Bobbi kunnt bald,
dr Schock sitzt tüf,
so isches jetzt halt.
Sobalds irgendwia goht,
tuan sie sich vermähla.
für an Goldring ischs zspot,
git an Rehfödlagäla.
Amna Morga am Zehni,
wört Theresa gebora.
Hät viel vom Neni,
aber vor Mama d´Schnora.
Mit dr Theresa,
i der Schesa,
lauft er z´Tresa,
öber d´Wesa.
Und er frogt sich,
wär sin Traum oh verhallt,
häti er d´Gerti,
a em Obet ned kn… knuddlet.
Erschienen in der LIEWO am 2.11.2020
Stadt. Land. Stuss. 